Spelemannslaget i BUL har ønske om å ta vare på folkemusikk/gammaldans og den festtradisjonen som byggjer på sosial dans og danseglede. Vi vil føre dette vidare til nye generasjonar. Denne nettsida er skapt ut frå det faktum at vi i Spelemannslaget hadde mange noteark å bla i, etter snart 40 aktive år. Når det kjem nye medlemmar, om så berre for ein kortare periode, så blir det mykje kopiering av notar. Laget opptrer i stor grad utan notar, men under innøving er notemateriale eit godt hjelpemiddel. Det tek tid å leite i permar etter rett note. Å hoppe fram og tilbake i fleire permar er upraktisk. Ikkje alle kan notar, og nokre ønskjer å ha notane framfor seg når dei spelar. Vi tok kontakt med firmaet TrønderData, der det viste seg å vere stor både musikk- og historieinteresse. Etter kort tid vart vi einige om at dette kan bli eit historisk dokument som kan vise fram denne musikksjangeren, like mykje som det kan vere eit praktisk arbeidsverktøy for eit aktivt lag. Utforming og datatekniske utfordringar har TrønderData løyst for oss; Jo Eskil Røset, sjefen sjølv Svein Tore Ertsås og andre trivelege tilsette har stilt opp! Vi byggjer stadig på når vi finn historisk materiale og nye melodiar vi ønskjer å bruke. Vi har òg lagt ut lydspor på melodiar der vi har opptak av laget. Det kjem lenkjer til både litteratur og musikk som har med dansemusikktradisjonen i Steinkjer å gjere. Slåttane vi spelar i laget, finn sin plass på nettsida. Takk til styret og resten av BUL, som alle har vore positive til dette, og at vi har fått sett i gang prosjektet med den kostnaden og omfanget det har fått. Takk òg til dei som starta spelemannslaget og som har teikna ned notar til bruk for laget. Dette kjem no alle til nytte og glede. Les gjerne meir om historia til laget under fana publikasjonar.

Notane, som ligg under “Våre notar”, er slåttar/melodiar vi har brukt i laget opp gjennom åra, eller fått når vi har delteke på kurs og tilstellingar. Lydspor som ligg på notane, er musikk vi har vore med på eller hatt ansvar for i laget. Noko av dette stoffet er produsert litt tilfeldig utan tanke på offentleggjering. Nokre lydspor kan òg vere henta frå nettet med aktive, tidlegare og noverande medlemmar, men i ein annan samanheng enn opptreden med laget. Vi håper at mange kan bidra med historier og kunnskap knytta til spelemanns-miljøet i Steinkjer kommune. Vi kan gjerne ta med tradisjonsmusikk frå eit større område til nettsida, om kapasiteten er der. Vi vil ta vare på, og prøve å levandegjere historia og den delen av kulturen/kulturarven som vi representerer.

Vi vonar at dette berre er første kapittel i eit veldig stort arbeid i tida framover, der ein kan fange opp og vidareføre ein positiv og god arv som vi har fått overlevert. Med dette prosjektet kan den som vil, ta med seg dette ut i verda, og dele ein bit av norsk tradisjon til underhaldning, praktisk aktivitet, eller berre rett og slett ta vare på det.

Nettsida har utspring i spelemannslaget i BUL, og utforminga er det BUL som eig. Slåttane, historiene, bileta mm har vi lånt, og dei høyrer til andre, men vi får gleda av å samle og fortelje dette vidare til nye generasjonar. Laget har sjølv skaffa og produsert noko stoff. BUL er eit ope frilynt lag, der alle med interesse for å drive aktiviteten som laget står for vidare, kan vere medlemmar. Blir laget lagt ned, er det lovene til laget og hovudorganisasjonen som gjeld for dette som for anna eige. Om det er naturleg å la andre drifte sida vidare, må det vere lag eller samanslutningar som er opne og inkluderande for alle. Om ingen ønskjer å ta det vidare, kan det hende dette rullar og går i bane på internett av seg sjølv som ein planet i verdsrommet.

28.01.2025

Magnar Kluken Leiar i nemnda og musikalsk leiar i spelemannslaget i BUL Steinkjer

Knut Finserås Medlem i nemnda og Leiar i spelemannslaget

Jakob Bjerkem Medlem i nemnda